Act 8 | DOB | STEP | Ta Saulo boda nidi 'i'awa bobo'anedi, Sitibeni 'ana loemwawasa manuna. 'Asiyata gote 'ena toekalesiyao sena Yelusalema 'ena 'adi talauwalao sie'ale be silosaiyedi, 'enega si'elelewana Yudia be Samelia senanao 'ediya, ta Yesu 'ana tosimanao site tuwelo dimo Yelusalema 'ena simiyami.

Acts 8

1 Ta Saulo boda nidi 'i'awa bobo'anedi, Sitibeni 'ana loemwawasa manuna. ^{▼▼ *Tomota Natuna: Yesu tauna 'ieesena The Son of Man, 'ana mwalatoi tomota tuga. Yesu taunamo 'ieesena Tomota Natuna, ta 'ina e'itao 'ediyega tomota simwalatonina 'aene tauna To'etoseyana Keliso.}

Saulo toekalesiyao 'ilosaiyedi

'Asiyata gote 'ena toekalesiyao sena Yelusalema 'ena 'adi talauwalao sie'ale be silosaiyedi, 'enega si'elelewana Yudia be Samelia senanao 'ediya, ta Yesu 'ana tosimanao site tuwelo dimo Yelusalema 'ena simiyami.

2 Ta 'aina tomota, taudi Yaubada 'ana to'amayabao, Sitibeni nina sisa'u 'ali'aliyena ma idi dedoi sinabwana. 3 Ta Saulo sa'i toekalesiyao 'ie'ediluluyedi ga manudi 'ilugulugu anuwa 'ebweuna 'ebweuna 'ediya, ta 'eguma toekalesiyao me'olotodi be mewainedi 'ilobalobadi, 'igiyaidi tuga, be deliya 'isa'u luguyedi.

Pilipi 'iloguguya sena Samelia 'enaya

4 Ta toekalesiyao si'elelewana, be 'abo to sena 'ena sitautauya, tetela bobo'ana siloguguyaena tomota 'ediya. 5 'Enega Pilipi 'imwa'uta 'ebweu Samelia 'asana 'enaya, ga nada To'etoseyana nina tetelina 'iloguguyaena 'ediya, 6 ga maibo'adi Pilipi 'ina ona sinonona, ta 'ina guinuwa waiwaidi si'itedi, 7 'eguma yaisigedi sile'oasa yaluyaluwa bi'i 'ediyega 'iula apwesedi ma bwaubwaudi, ta wate tokwenoyao be tolopegoiyao 'igiebobo'anedi. 'Enega boda nidi sitagwatagwala leleleya Pilipi 'ina loguguya 'enaya, 8 ta 'enega 'ebe gwausowala sinabwana 'asa nina 'enaya.

9 Ta toni'asa 'ebweuna, 'ana esana Saimoni, tauna Pilipi 'ina ona 'iemisena. Saimoni nina lowa 'i'oba'oba sinabwana 'asa nina 'enaya, 10 ga me Samelia maibo'adi sinuwaowana 'ina guinuwa waiwaidi manudi, ta Saimoni tauna 'ana esana sinabwana. 'Enega tomota maibo'adi, nai 'inapwanao, nai gomabesoyao, Saimoni nina siemisena, ta sigwaegwae, “Tauna Saimoni nina toewaiwai sana, Yaubada 'enega.” 11 'Enega Saimoni 'ina onao sinonodi, manuna 'ina 'obega 'igienuwa owanedi tuta yauyauna 'ediya. 12 Ta muliyega Pilipi nina 'iapwesama ga tetela bobo'ana, To'etoseyana Yesu 'ana esana be Yaubada 'ina loina manudi, 'iloguguyaedi, ta siemisena, ga sibapitaiso, 'oloto be wate iine. 13 Ta Saimoni wate Yaubada 'iemisena, ga 'ina bapitaiso mulinaya Pilipi ma'iyana simiyami. Ta Saimoni nina Pilipi 'ina edeededeyao be 'ina guinuwa waiwaidi 'i'itedi, ta 'enega 'inuwaowana 'ai'aila.

14 'Enega Yesu 'ana tosimanao taudi Yelusalema 'ena simiyami, ale sinonona 'aene me Samelia ni'atu sitagwala Yaubada 'ina ona 'enaya, 'enega Pita be Yoni sietunedima, 15 ga siteluwa nidi simwa'uta Samelia 'ena, ga toemisa auwaudi manudi sisidasida be 'aene Yaluyaluwa Tabuna 'ediya 'ida lugu, 16 manuna ma'etamo nigeya 'ilugulugu 'ediya. Nate namo 'Inapwana Yesu 'ana esanega sibapitaiso. 17 'Enega Pita be Yoni nimadi sisa'udi 'ediya ga Yaluyaluwa Tabuna 'ediya 'ilugu. 18 Ta Saimoni guinuwa gete 'i'itena 'aene Yesu 'ana tosimanao nimadi sisa'udi tomota 'ediya ga Yaluyaluwa Tabuna 'ediya 'ilugu, 'enega mani 'i'ewena be 'aene Pita be Yoni 'ida 'ebwa'edi, 19 ta 'igwae, “'Imi waiwai nate nuwanuwagu wa'ebwa'egu, be 'enega 'abo nimagu yasa'u yaisigedi 'ediya Yaluyaluwa Tabuna 'ediya 'ida lugu.”

20 Ta Pita Saimoni 'iba'ena, 'igwae, “'Imu mani ma'iyayo wada esilae ataya, manuna 'aene Yaubada 'ina oboboma 'imu mani 'enega 'ugimwane. 21 'Oyo nigeya 'ima boda, ta esi 'ateyo 'ibubuna geyogeyoi Yaubada matanaya. 22 'Enega 'ilobweneyo be 'imu to'umalina gete 'enega 'unuwa'ebuni, be 'usidasida Yaubada 'ena, be nai 'imu nuwanuwa gete to'umalina 'ida nuwatau, 23 manuna yamwalatonimu 'ateyo 'ibaila, e'ipi'ipi be bubuna to'umalina 'ediyega.”

24 Ta Saimoni 'igwae, “Wasidasida 'Inapwana 'ena be yage nidi to'umalidi wasimanediya, geya'abo 'eguya simeemai.”

25 'Enega Pita be Yoni 'idi 'Inapwana manuna sisimana apwesa, ta 'ina ona siloguguyaena, ga muliyega siila Yelusalema 'enaya, ta 'idi tauya solanaya tetela bobo'ana sisimanena Samelia 'asanao 'ebweuna 'ebweuna 'ediya.

Pilipi goma Idiopia 'ebweu 'igie bapitaisoena

26 Ta Yaubada 'ina anilose Pilipi 'ieonena, “'Utoolo be 'asuoleoleya 'eda nina Yelusalemega be Gasa 'enaya 'enega 'utatauya.” 'Eda nina sena mwatui daita 'enega 'itautauya. 27 'Enega Pilipi 'itoolo ga 'itauya, ga goma Idiopia ina waga lisilisi 'enega 'itautauya 'ilobena, tauna tai 'ewa'ewana, ta 'ana esana sinabwana, ta 'idi kuwini Kanidesi manuna 'iguiguinuwa, nate 'ina esaesa maibo'adi 'i'ita'i'isidi, ta tauna ni'atu 'imai Yelusalema sabi tapwalolo, 28 ga 'ina waga lisilisiyega 'iilaila 'ina 'asaya, ta waga lisilisi 'ena 'igelu ta Buki Tabu 'isawasawa, Palopita Aisea 'ina 'etoladi 'isawasawai.

29 'Enega Yaluyaluwa Tabuna Pilipi 'ieonena, “'Ulomanini be waga lisilisi 'ena 'utatauya.” 30 'Enega Pilipi 'ipili, ga tai nina 'enana 'inonona palopita Aisea 'ina 'etoladi 'isawasawa. Ta Pilipi 'igwae, “Mwa'adega, ona nidi 'usawasawadi 'umwalatonidiya?”

31 Ta tai nina 'igwae, “Nigeya, manuna nigeya wate 'igu toe'itamo.” 'Enega tai nina Pilipi 'ibwauyenama wagaya, ta Pilipi 'igelu ga selabenaya 'imiyatowa ga Buki Tabu nina 'isawena, 32 ta sawa nina ni'atu 'isawena gete nadigega 'igwae,

“Tauna 'atuwa sipi 'iabe siunu, nai nadigega lami, 'abo unuununa 'ana to'upwa matanaya 'itootoolo, nigeya 'ebweu wate 'enana 'ida ona apwesena. 33 Ta wate 'ina etala 'ena sikaboena, ga 'iomayamaya. 'Enega natunao tetelidi nigeya 'ebweu yaita 'ida simana apwesena, manuna yawasina bale'uya ni'atu 'igumwagumwala.”

34 Ga goma Idiopia nina Pilipi 'ieonena, “Yaita manuna palopita gete 'ionaona? tauna manuna? nai mali tai manuna?”

35 'Enega Pilipi 'ie'ale sawa nina 'ana li'ama manuna ga Yesu tetelina 'ie'itaena.

36 Ga 'eda nina sitautauya ga bwasi si'ita lobena, ta tai nina 'igwae, “Gote bwasi! Mwa'adega, kapekapeyana be 'ugie bapitaisoegu, aga?”

38 'Enega 'ina toguinuwao 'iloinedi ga waga lisilisi sigie losa'una, ga siteluwa Pilipi ma'iyana sisuya ta siebusi bwasiya, ga Pilipi tai nina 'igie bapitaisoena. 39 'Enega bwasiyega situ'ema ga Yaubada Yaluyaluwana Pilipi 'i'au'ewena, ga tai nina nigeya Pilipi 'i'ita'ita lima, ta ma ina gwausowala 'itauya 'ina 'asaya.

40 Ta Pilipi sa'i silobena 'asa Asota 'ena, ga 'enega 'itautauya, ta tetela bobo'ana 'iloguloguguya 'asa 'ebweuna 'ebweuna 'ediya, ga 'ana laba 'iapwesa Sisalia 'enaya.